Kort statusrapport frå Vossevangen: Målungdomslaget Vossamaol er starta opp! Til saman tolv ettermiddagsfriske folkehøgskuleelevar fann vegen til skipingsmøtet, som resulterte i både fleire innmeldingar og eit feiande flott styre i Norsk Målungdoms ferskaste (og kanskje mest veldøypte …) lokallag! Her er eit bilete av 80 % av styret, som i sjølvsikker positur står og skuggar for utsikta til europaveg 16.
Fire av fem styremedlemer i det nyskipa Målungdomslaget Vossamaol
Den spanande ventetida før jubileums-landsmøtet 25. – 27. mars er ikkje berre tida der snøen etter planen skal trekkja seg vekk og sopa med seg vegsalt og strøsingel frå vegkantane og gje rom for ny grøde frå markene rundt om i vårt linne land. Det er òg tida for jubileumsårsmøte i alle dei feststemte lokallaga våre! Den 23. februar får eg gledja av å vera med å skipa eit slikt…
Den 23. februar drar eg nemleg til sør-vestlandsperla Sandnes i Rogaland, for å skipa årsmøte i Målsiddisane. Møterom og band er booka. Møtet blir på L54 i Langgata, og det framåtstormande, lokale dialekt-indie-pop-rock-bandet «Sporv», skal ikkje spela ein liten akustisk-trådlaus konsert likevel, grunna «UKM». Alle som har høve til å koma, bør likevel ha notera notert seg datoen, og dukka opp kl. 18.00!
Førebels ser alt ut til å gå etter planen, med unnatak av ein liten detalj: Det hør seg og bør seg nemleg slik at den vitjande sentralstyremedlemen, i dette høvet meg, Bror-Magnus, held ei lita innleiing på årsmøte om noko viktig og interessant. Eg veit berre ikkje kva! For å gjera kort prosess på heile kvalen til valet, har eg landa på å organisera ei avrøysting her på sentralstyrebloggen over kva innleiinga mi skal dreia seg om. Me tjuvstartar årsmøtet med å fatta eit vedtak her. Teljekorps er meg sjølv. Og me røyster…
Så blei det visst innleiing om sidemål denne gongen. Godt det var så tydeleg fleirtal tidleg i prosessen så eg hadde god tid på å førebu meg. Tusen takk for at ingen røysta på «ingenting, innleiingar er så keisame…»!
Slik kjem du deg frå A) Sandnes Sentrum (togstasjonen) og Rúten til B) L54. Vel møtt!
(Du kan melda deg på årsmøtet si fjesbokhending her, og finna ut meir om Sporv her og her, samt høyra korleis dei høyrdest ut før dei bestemte seg for å syngja på dialekt.)
I helga møttest landsstyret til det tredje av fire landsstyremøte i arbeidsperioden, og eg må verkeleg seia at dette var eit bra møte! Gode diskusjonar, triveleg stemning, og gjennomføringa skjedde til alt overmål nokolunde i samsvar med oppsett møtetid – noko som ikkje har vore sjølvsagt på februarmøte tidlegare år … Dette er nemleg det “tyngste” møtet i året, sidan dei fleste landsmøtesakene skal handsamast her – årsmelding, rekneskap, arbeidsproblem, lov- og tuftbrigde, etc.
Såleis er det ein ekstra fjør i hatten til det herlege landsstyret vårt at møtet vart så bra som det vart! 🙂 Det lover godt fram mot jubileumslandsmøtet i slutten av mars som skal vera her:
Foto: Kjetil Ree, CC-BY-SA
Medan debatten går i Klassekampen om kor fæle nynorskfolk er til å kjefta og klaga på kvarandre, har eg hatt eit lesarbrev om sidemål på trykk i Stavanger Aftenblad. Og reaksjonen kom relativt raskt – her er ei tekstmelding eg fekk 16.28 i ettermiddag, som eg må innrømma at fekk meg til å trekkja godt på smilebandet:
Jeg viser til ditt innlegg i Stavanger Aftenblad i dag. Nynorsk er en pest og en plage og slike som deg burde flytte til fjells hvor dere kan knote sammmen hele dagen på dette grusomme målet. Mvh/(fullt namn)
Eg veit ikkje heilt kva som er løgnast: At ein 51 år gamal mann (med flott stillingstittel og høg løn) synest det er heilt på sin plass å spora opp og senda slike tekstmeldingar til ungdomar som engasjerer seg i organisasjonslivet? Eller det lett paradoksale uttrykket frustrasjonen tek i det avsendaren lirer av seg krinsrekord i usakleg innhald, pakka inn i ei forunderleg sober form (“med vennlig hilsen” og fullt namn, liksom)?
Uan-z: Etter å ha humra litt for meg sjølv, tenkte eg at eg måtte jo vera høfleg og skriva tilbake. Så vår ven fekk litt smiger per SMS i retur:
Takk for omtanken, men eg trivest godt med å bruka nynorsk i urbane omgjevnader. Og dersom eg hadde flytt til fjells, ville eg jo gått glipp av alle dei konstruktive tilbakemeldingane frå storsinna kjernekarar som deg. <3
Varme målhelsingar frå Vebjørn
Korrespondansen har inntil vidare stoppa der. I mellomtida: Skulle det vera fleire nynorskhatarar med utblåsingsbehov der ute, så er eg tilgjengeleg på 924 16 527. Ver merksam på at innsende meldingar kan hamna ute på verdsveven, men eg skal ikkje publisera namn. Trur eg. 😉
… til vinterleir! Eg gler meg som ein liten unge, både til programpunkta, programpausane og – kanskje viktigast – å treffa alle dei kjekke folka som er påmelde! Og apropos det: Er du påmeldt?
Dersom ikkje: Det er klart, du kan la vera å koma, men vil du verkeleg sitja og stura resten av året fordi du ikkje fekk med deg vinterens desiderte høgdepunkt? Eg berre spør.
Og medan du tenkjer, kik litt på denne evigunge og ikkje så reint lite attråverdige herremannen som kjem på vinterleiren for å læra deg om målstoda i Wales:
Dette er altså Sigbjørn, tidlegare leiar i NMU, no er han telemarksforskar. Kan du motstå? Kan du?
Det kan i alle fall ikkje eg. Så då finn du meg – i lag med kremen av norsk ungdom – på Geilo frå og med neste fredag.
Nyttårsrakettane bles for det meste bort i år, i alle fall i Stavanger, men kva gjer vel det når nynorskverda ordnar sitt eige fyrverkeri? Til helga skal arbeidsprogramnemnda i NMU møtast for å klekka ut ein slagplan for den komande arbeidsperioden – jubileumsarbeidsperioden. Og i mellomtida kan me la oss inspirera av at dei fleste ser ut til å gjera sitt beste for å gje jubileumsåret ein nynorsk rakettstart:
– Allkunne og Wikipedia er i tottane på kvarandre. Eller, meir presist: Allkunne er i tottane på Wikipedia. (Endå ei presisering: Fram til neste nyttår heiter det naturlegvis jubileumstottane)
– Olav H. Hauge-senteret i Ulvik har premiere i morgon (eller i dag, teknisk sett).
– … og i samband med at Forum for norskfaget føreslår éin felles karakter i norsk, har sjølvaste VG laga ei heilsidesak – på nynorsk! – med stort bilete av leiar-Janne. Jø og fyse!
Og endå skriv me berre 13. januar. Dette vert litt av eit år! (Eller jubileumsår, for å vera presis)
Men for å koma til det eigentlege poenget: Dersom du sit på ein genial idé (ein jubileumsidé …) som arbeidsprogramnemnda bør få med seg, så kan du til dømes leggja att ein (jubileums-)kommentar her på (jubileums-)bloggen. Eg kan naturlegvis ikkje lova at alle innspel vert ukritisk inkorporerte i apo-framlegget, men eg garanterer at me skal sjå på det som kjem!
Enn så lenge: Stå på, fred ut og takk, Ivar Aasen.
Jolekvelden nærmar seg, og sentralstyret tek seg snart ferie. Når me kjem attende er det 2011, sjølvaste jubileumsåret, men det fortener eit eige innlegg her på bloggen. I mellomtida kan de kosa dykk med nokre julesongar på nynorsk.
Visste du mellom anna at «Deilig er jorden» finst i nynorsk omsetjing under namnet «Fager er jordi»? Songen er kanskje ikkje like mykje nytta som «Det hev ei rose sprunge», men fin likevel! Ein annan fin, men kanskje mindre kjend julesong er «Kling no, klokka».
Dersom du svergar til på dialekt, er kanskje «Vårres jul» av Hans Rotmo noko av det finaste eg veit. «Vårres jul» som òg var namnet på plata, var faktisk den fyrste sekulære, eller ikkje-religiøse joleplata som vart gjeven ut i Noreg.
Den finaste nynorske julesongen er kanskje likevel «Det lyser i stille grender». Teksten er skriven av Jakob Sande, og sto opphaveleg på trykk i «Jul i Sunnfjord» med tittelen «Julekveld».
Dette og meir til finn du på heimesidene til Ivar Aasen-tunet.
God jol og godt nyttår frå Sentralstyret i Norsk Målungdom
Norsk Målungdom er stolte av å gi Dialektprisen 2010 til bergensrapparen Lars Vaular. Det skjedde i dag på Gimle festsal i Bergen. Janne var glad då eg snakka med henne på telefonen etterpå: “Alt gikk bra, og landsstyret har nok ein gong valt ein superhyggeleg prismottakar!”
Gratulerer, Lars!
Les meir i pressemeldinga frå Norsk Målungdom
Kontorhunden Guri spør: Kvifor er det ikkje nynorsk i vg.no og dagbladet.no?
Ho har eit tips: nynorskvg.no.
I går sette me opp juletreet på Skrivarstova som me deler med Noregs Mållag.
