About Vebjørn

24 år, frå Stavanger, leiar. Aktiv målungdom sidan 2004. Går aldri av vegen for ein blaut vits.

Opplading til sumarleir, #4

Me har vore innom actionbilete frå fotballturneringa i 2008, solskinsbilete av transportskranglekassa frå 2010, og feststemning frå den vidgjetne hundreårsleiren i Sverige i 2005. Nok ein gong føretek me eit sjangerbyte, og denne gongen skal det handla om motar og trendar.

Me skal nemleg tilbake til 2007 denne gongen. Då sumarleiren var i Risør, og tydelegvis då det også var ein viss type solbriller som var usedvanleg godt utbreidde i det segmentet av folkesetnaden som femner om målpolitisk interesserte ungdomar.

Før me slepper biletmoroa laus, så må eg få orsaka – eller i det minste konstatera – at tidlegare leiar Jens Kihl figurerer for tredje gongen på fire oppladingsbilete. Rett nok var han statist i bakgrunnen på det fyrste, men ein viss overrepresentasjon må me vel vedgå at det er. På den andre sida: Du kan jo tolka det som eit hint, som ei slags målpolitisk produktplassering, fordi Jens Kihl er eit av trekkplastera til den makelause jubileumssumarleiren på Vinstra 5.-10 (har du meldt deg på, forresten? Det bør du!). Han skal nemleg stå for sjølvaste jubileumsquizen!

I mellomtida kan du nyta fotografiske prov på Jens, Trine og Bror sin innsats for å praktisera det internasjonale motebiletet på sumarleiren 2007:

Tre kjekke målungdomar viser fram solbrillemoten for 2007

Øvst frå venstre: Jens Kihl demonstrerer korleis du bruker solbriller samstundes som du et. Bror-Magnus Sviland Strand viser korleis du har på deg solbriller medan du smiler pent til kamera, medan Trine Østereng kombinerer solbrillebruk med eit interessert og lyttande andletsuttrykk. Merk også korleis alle tre har litt ulik fargenyanse i brilleglasa, slik at trente auge lett kan sjå at dei veit å skilja seg ut i aksessoir-vegen. Foto: Odin Omdal Hørthe

Opplading til sumarleir, #3

Ja, folkens, episode tre i den vesle biletføljetongen vår er endeleg her. Denne gongen skrur me klokka tilbake til retteleg gamle dagar, til den gongen då Kjell Magne Bondevik var stasminister. I dei tidene var 2011-russen framleis berre åttandeklassingar, klimaspørsmålet var framleis sjeldan på dagsorden utanfor naturfagsbøkene, Noreg låg tjue plassar under Sverige og Danmark på FIFA-rankinga, underskriftskampanjen Slepp nynorsken til! samla smått ufattelege 36 000 – trettiseks tusen – underskrifter for å opphevda nynorskforbodet i VG og Dagbladet og den nye Svinesundsbrua var rykande fersk. Eg snakkar med andre ord om 2005, året då Norsk Målungdom feira 100 års sjølvstende frå Sverige med å leggja sumarleiren til Marstrand i Kungälv kommun, utanfor Göteborg.

Som du ser er det mykje som har endra seg dei siste seks åra. Bondevik er historie, 2011-russen er russ, klimakampen har dundra og gått i lange tider, Noreg ligg (i alle fall til saman …) godt over tjue plassar høgare enn Sverige og Danmark, me har bytt underskriftskampanje med maskinomsetjing-av-nettutgåvene-til-VG-og-Dagbladet-kampanje, og dei som køyrer over Svinesundsbrua har snart fullførd ein tredel av bompengeperioden.

Sumt er likevel ved det gamle: Framleis skipar me til sumarleirar, framleis kulminerer dei i ein heidundrande sumarleirfest siste kvelden. Og framleis går dette føre seg ved at kremen av norsk ungdom kler seg i høvelege klede, med høvelege frisyrar og drikk høveleg appelsinbrus med fotofjeset parat. Sjå berre her:

Halldis og Jens er kledde til fest!

Her er i sanning det som på sidemål heiter «Kodak Moment». Legg særleg merke til Arild Rønsen-looken på skjorta til den kjekke (og den gongen også unge) herremannen til høgre!

Sidemål for full musikk

Sidemålsballen rullar verre enn på lenge. Det kan vera vrient å halda seg oppdatert på kva som skjer, så her er ei lita oppsummering med eit utval peikarar til diverse nyhendesaker.

Sjølve saka:
– Høgre sitt landsmøte har vedteke ei fråsegn der dei går inn for å avskaffa obligatorisk sidemål i ungdomsskulen. Høgre er frå før tilhengjar av å gjera akkurat det same i vidaregåande, men no har dei altså også gått inn for å avskaffa obligatorisk sidemålet over heile fjøla.

Lyspunkt:
– Det finst mykje motstand sentralt i partiet mot vedtaket. Arne Hjeltnes (sentralstyremedlem) var mellom dei mest profilerte sidemålstilhengjarane på talarstolen, og både Erna Solberg (leiar) og Jan Tore Sanner (nestleiar) var mellom dei som røysta mot å fjerna sidemålet. (http://politisk.tv2.no/nyheter/hoyre-vil-fjerne-obligatorisk-sidemal/)
– Det finst også motstand i «distrikts-Høgre». Eitt døme er ordføraren på Stord, Liv Kari Eskeland, som har uttalt at ho vil mobilisera Vestlandet til kamp! (http://www.sunnhordland.no/article/20110509/NYHENDE/705099983)
– Tilsvarande lovnader kjem også frå Sogn og Fjordane Høgre, som lovar omkamp i sidemålssaka når Høgre skal meisla ut valprogrammet for neste stortingsperiode. (http://www.firdaposten.no/lokalnytt/article5600801.ece, http://www.firda.no/nyhende/article5601461.ece)
– Sogn og Fjordane Unge Høgre er på parti med sidemålet! (http://www.nrk.no/nyheter/distrikt/nrk_sogn_og_fjordane/1.7624228)

Reaksjonar:
– Romsdals Budstikke kallar – på leiarplass! – vedtaket for «eit kupp» (http://www.rbnett.no/meninger/leder/article336965.ece)
– Thor Bjarne Bore, Venstre-nestor som tidlegare har vore m.a. redaktør for Aftenbladet, Vårt Land og RB, slaktar vedtaket opp og i mente på Aftenbladet-bloggen sin (http://www.aftenbladet.no/wp/borebloggen/2011/05/09/frivillige-2-gradsligninger/)
– Avisa Sunnhordland brukar leiarspalta si til å varsla eit dårleg lokalval for Høgre i kommunane i Sunnhordland (http://www.sunnhordland.no/article/20110510/LEIAR/705109985)
– Twitter-straumen kan de lesa sjølv. Eg registrerer (i skrivande stund) stor overvekt av støtte for sidemålsopplæring. (http://twitter.com/#!/search/sidem%C3%A5l)
– Troms Folkeblad åtvarar Høgre mot å «kødde med Bunads-Høgre» (http://www.folkebladet.no/meninger/leder/article453206.ece)
– Olav Kobbeltveit i Bergens Tidende meiner Høgre sitt framlegg vil gjera sidemålet til eit «kosefag» (http://www.bt.no/meninger/kommentar/kobbeltveit/Hoegre-og-Frps-nye-kampsak-2498204.html)

Målungdomen:
– Janne var i radiodebatt med Elisabeth «Nynorsk er fint i dikt» Aspaker* på Dagsnytt 18 i går. (http://www.nrk.no/nett-tv/indeks/262753/)
– Tone var i Budstikka på sundag (https://web.retriever-info.com/services/facsimile/pdf_id-020079201105072X7pwv2vLjKY3nqDEI2kAOz9100001010224_x-019b2a0aa873502431d2451c346fb68f_mt-print_y-785cf922170867c1417ea91e08ca9a1e.pdf)
– Eg er i Solabladet i dag (https://web.retriever-info.com/services/facsimile/pdf_id-055107201105102K24uc0WYdj21LYTXG0E7MDq10000101050c_x-58ae0d29d98432ba43f0fdf60d86832a_mt-print_y-eb3d417998f023a80278cbe3f29d3177.pdf) og har elles starta ei lita Facebook-side til støtte for dei mindretalsverande sidemålsheltane i Høgre (http://www.facebook.com/pages/Moralsk-st%C3%B8tte-til-sidem%C3%A5lsvenlege-H%C3%B8gre-folk/144992338905501)

Mållaget:
– Leiar Håvard Øvregård (som også er Høgre-mann …) kallar Høgre «kunnskapslause» (http://www.tv2nyhetene.no/innenriks/politikk/hoeyre-faar-nynorskkjeft-3488934.html?utm_source=twitterfeed&utm_medium=twitter), seier dei «gjer knefall for Unge Høgre» (http://www.nationen.no/2011/05/10/politikk/hogre/nynorsk/hoyre/noregs_mallag/6621039/) og hevdar dei går til åtak på nynorsk som nasjonalspråk (http://framtida.no/articles/hogre-til-angrep-pa-nynorsk-som-nasjonalsprak). Han skriv også at Høgre, om dei får gjennomslag, vil leggja berebjelken for norsk språkpolitikk i hendene på 13-åringar (http://www.utdanningsnytt.no/4/Meny-A/Debatt/Debattinnlegg-2011/Ikkje-lat-Hogre-svekkje-nynorsken/)
– Nestleiar Aud Søyland meiner vedtaket er starten på ein kampanje mot jamstellingsvedtaket av 1885 (http://www.aftenposten.no/meninger/debatt/article4116595.ece)
– Mållaget har også laga eit oversyn over «5 mytar om sidemål» (http://www.nm.no/tekst.cfm?id=3304)

Sådär. Slik ser det ut til no, og det kjem sikkert meir. De kan vel halda dykk oppdaterte på nynorsk.no og nm.no frametter, kan henda eg også oppdaterer denne saka her om det passar seg slik. Og: Om nokon kjenner skrivekløa, så er det sjølvsagt berre å fyra laus med lesarbrev og presseutspel – skal me snu Høgre treng me alt det trykket me kan få!

Opplading til sumarleir, #2

Som eit lite avbrekk opp ei all sidemålsviraken presenterer me andre del i oppladingsserien av biletblogging fram mot den makelause jubileumssumarleiren på Vinstra 5.-10. juli som du berre MÅ melda deg på med det absolutt aller fyrste. Som sist er det bilete frå tidlegare sumarleirar som er tingen, og me byter motiv frå fotballturnering til logistikk. Leigebilane me ordnar oss til ulike tilskipingar er ofte av verneverdig karakter, og det museale klimakset kjem til vanleg nettopp på sumarleirane. Lat oss mimra litt tilbake til sumarleiren i Arendal i 2010, og den … unike … doningen som etter kort tid vart oppkalla etter den velkjende atomubåten Kursk:

Leigebilen me hadde under sumarleiren i Arendal i 2010.

Uran eller plutonium? Neimen om eg veit, men bilen minna farleg mykje om korleis engelskspråklege actionfilmar ville ha framstilt eit mobilt lagerhus for brenselsstavar i Murmansk. MEN, som alltid, det er det indre som tel: Bilen sveiv som berre juling, og frakta attpåtil sentrallekken heim til Oslo i tide til VM-finalen! (At den enorme storleiken seinare på kvelden avfødde ei parkeringsbot, får me heller sjå mellom fingrane ...)

Opplading til sumarleir, #1

Oi! Der var me allereie i mai, og det er no altså berre to månader att til årets store hæppening (som det heiter på sidemål) – jubileumssumarleiren på Vinstra 5.-10. juli. Det er med andre ord på tide å byrja oppladinga, og det gjer me med biletsnacks frå sumarleirar som har vore. I dag, eit blinkskot frå den tradisjonsrike fotballturneringa, som illustrer til fulle kor lågt me legg lista til ferdigheiter, både når det gjeld skot og målvaktsspel. 🙂

Nedst frå venstre: Eirik viser aktivt og oppsøkjande forsvarsspel, Ulrikke demonstrerer den til då ukjende målvaktsteknikken "kneklypa", og Kristian har innteke rolla som den døyeleg effektive måltjuven som er like god med venstre som med høgre. Øvst frå venstre: Jens tilbyd ei kjærleg, støttande hand til sportsfotograf Anne Guro. Bak kamera: Odin. Biletet er frå den særs minneverdige sumarleiren i Aurland i Sogn i 2008.

Nye tider på skrivarstova

I uminneleg lange tider har planløysinga på NMU-kontoret vore omtrent slik:

– hyller langs veggane
– skrivebord og arbeidsstasjonar ved vindaugo
– eit salig rot på resten av golvflata

Pluss på med overfylte hyller og konturane av eit bord som kunne skimtast under den største rotehaugen, og vips – så har du oppskrifta på eit fysisk arbeidsmiljø med vesentleg betringspotensiale. Men no skal alt verta så mykje betre. I går hadde nemleg eg og Kristian vore og kjøpt oss nye hyller! (Nei, ikkje slike hyller! Lagerhyller!) Høveleg nok ber hyllene same namnet som nynorskens far, og til liks med sistnemnde har dei nye hyllene no gjort omgjevnadene på skrivarstova uhorveleg mykje betre. For dei interiørinteresserte lesarane av sentralstyrebloggen kjem her ei lita oppskrift på “korleis gjera eit overfylt kontor til eit triveleg arbeidsareal på 1-2-3.”

Steg 1: Ingrediensane. Du treng: To kjekke gutar, ein drill (eller noko anna å skru med), og dugeleg med Ivar-hyller frå Ikea.

Ingrediensane: To kjekke gutar og dugeleg med Ivar-hyller frå Ikea.

Eks-sivilarbeidarane Kristian (t.h.) og Vebjørn nytta påskefreden i hovudkvarteret til å driva organisasjonsbygging på veldig bokstaveleg vis. Arbeidet vekte sjølvsagt mange kjære siviltensesteminne. Foto: KrinkenVisuelt

Steg 2: Montér hyllene på høveleg stad.

Kristian demonstrerer monteringsteknikk og innreiingsrøynsle av aller ypparste merke.

Kristian demonstrerer monteringsteknikk og innreiingsrøynsle av aller ypparste merke. Foto: KrinkenVisuelt

Steg 3: Fyll hyllene med all driten som ligg på golvet eller er med på å overfylla andre hyller. Pynt gjerne med portrettbilete av kjende nynorskingar eller oversynsfoto over fjelltoppar på Sunnmøre.

Resultatet - ei ny, funksjonell hylle og eit ryddig, forfriskande arbeidslokale!

Så fint kan det altså verta! Ti nye kvadratmeter med hylleplass, kledeleg dekorert med dei tre store - Garborg, Vinje og Kolåstinden - i glas og ramme! Om ikkje dette er til glede og inspirasjon, så veit ikkje eg! Foto: KrinkenVisuelt

Og voila – som det heiter på sidemål – så enkelt kan det gjerast. Fleire nynorske interiørtips kan du til dømes finna på bloggen Den gode feen. Kvinna som er forresten kåra til årets nynorskbrukar, om du lurte på kva nynorsk har med interiørbloggar å gjera.

God påske!

#Vossamaol

Kort statusrapport frå Vossevangen: Målungdomslaget Vossamaol er starta opp! Til saman tolv ettermiddagsfriske folkehøgskuleelevar fann vegen til skipingsmøtet, som resulterte i både fleire innmeldingar og eit feiande flott styre i Norsk Målungdoms ferskaste (og kanskje mest veldøypte …) lokallag! Her er eit bilete av 80 % av styret, som i sjølvsikker positur står og skuggar for utsikta til europaveg 16.

Målungdomslaget Vossamaol, her representert av styret minus meirverdigavgift (80 %, liksom. 4/5.)

Fire av fem styremedlemer i det nyskipa Målungdomslaget Vossamaol

Februarmøtet vel overstått

I helga møttest landsstyret til det tredje av fire landsstyremøte i arbeidsperioden, og eg må verkeleg seia at dette var eit bra møte! Gode diskusjonar, triveleg stemning, og gjennomføringa skjedde til alt overmål nokolunde i samsvar med oppsett møtetid – noko som ikkje har vore sjølvsagt på februarmøte tidlegare år … Dette er nemleg det “tyngste” møtet i året, sidan dei fleste landsmøtesakene skal handsamast her – årsmelding, rekneskap, arbeidsproblem, lov- og tuftbrigde, etc.

Såleis er det ein ekstra fjør i hatten til det herlege landsstyret vårt at møtet vart så bra som det vart! 🙂 Det lover godt fram mot jubileumslandsmøtet i slutten av mars som skal vera her:

Landsmøtestaden 2011. Foto: Kjetil Ree, CC-BY-SA

Foto: Kjetil Ree, CC-BY-SA

Ufriviljug humor per tekstmelding

Medan debatten går i Klassekampen om kor fæle nynorskfolk er til å kjefta og klaga på kvarandre, har eg hatt eit lesarbrev om sidemål på trykk i Stavanger Aftenblad. Og reaksjonen kom relativt raskt – her er ei tekstmelding eg fekk 16.28 i ettermiddag, som eg må innrømma at fekk meg til å trekkja godt på smilebandet:

Jeg viser til ditt innlegg i Stavanger Aftenblad i dag. Nynorsk er en pest og en plage og slike som deg burde flytte til fjells hvor dere kan knote sammmen hele dagen på dette grusomme målet. Mvh/(fullt namn)

Eg veit ikkje heilt kva som er løgnast: At ein 51 år gamal mann (med flott stillingstittel og høg løn) synest det er heilt på sin plass å spora opp og senda slike tekstmeldingar til ungdomar som engasjerer seg i organisasjonslivet? Eller det lett paradoksale uttrykket frustrasjonen tek i det avsendaren lirer av seg krinsrekord i usakleg innhald, pakka inn i ei forunderleg sober form (“med vennlig hilsen” og fullt namn, liksom)?

Uan-z: Etter å ha humra litt for meg sjølv, tenkte eg at eg måtte jo vera høfleg og skriva tilbake. Så vår ven fekk litt smiger per SMS i retur:

Takk for omtanken, men eg trivest godt med å bruka nynorsk i urbane omgjevnader. Og dersom eg hadde flytt til fjells, ville eg jo gått glipp av alle dei konstruktive tilbakemeldingane frå storsinna kjernekarar som deg. <3
Varme målhelsingar frå Vebjørn

Korrespondansen har inntil vidare stoppa der. I mellomtida: Skulle det vera fleire nynorskhatarar med utblåsingsbehov der ute, så er eg tilgjengeleg på 924 16 527. Ver merksam på at innsende meldingar kan hamna ute på verdsveven, men eg skal ikkje publisera namn. Trur eg. 😉

Berre éi lita veke igjen …

… til vinterleir! Eg gler meg som ein liten unge, både til programpunkta, programpausane og – kanskje viktigast – å treffa alle dei kjekke folka som er påmelde! Og apropos det: Er du påmeldt?

Dersom ikkje: Det er klart, du kan la vera å koma, men vil du verkeleg sitja og stura resten av året fordi du ikkje fekk med deg vinterens desiderte høgdepunkt? Eg berre spør.

Og medan du tenkjer, kik litt på denne evigunge og ikkje så reint lite attråverdige herremannen som kjem på vinterleiren for å læra deg om målstoda i Wales:

Sigbjørn på vinterleiren i 2007 - han kjem i år òg!

Dette er altså Sigbjørn, tidlegare leiar i NMU, no er han telemarksforskar. Kan du motstå? Kan du?

Det kan i alle fall ikkje eg. Så då finn du meg – i lag med kremen av norsk ungdom – på Geilo frå og med neste fredag.